Me ne mal ma û ne can ma
Ne canikek ne ciwan ma
Ne hêvî û ne hêvan ma
Em çi bikin li vî warî ?
Her malekê yekî kal ma
An mirdarekî navsal ma
Ne birak û mam û xal ma
Tev sêser bûn ji vî warî
Tevan bar kir bîranîn ma
Kul û derd û bes birîn ma
Behlûl, dîwane û dîn ma
Kiyê hilde xwe vî barî
Bar giran bû bi me şer ma
Zarok mir ji ta û serma
Min pirs kir her kes li ber ma
Kesek ne tayê vî karî
Me ne kar ma, ne karker ma
Ne ew dara ku xweşber ma
Me ne rêkek ne rêber ma
Roj li me bû şeva tarî
Roj û ronî çûn reşî ma
Dilpakî çû, zikreşî ma
Rûxweşî çû rûreşî ma
Venagere qet ti carî
Venagere kok wê dema
Ken û lîsk, şahî û sema
Em ê herin bi van xema
Bi girî, şîn, ah û zarî
Ax û fîxan ne haldema
Dimiçiqe mîna çema
A li min, min kir, a te ma
Gur pezê min û te xwarî
Bi dest guran ketî tema
Mal û milkê me çû hema
Tiştek îro bi me nema
Em perçe bûn parî parî
Em pergende bûne çima
Wek benîşt û mîna şima
Ser zimanê xelkê dima
Navê Kurdê Hind û Arî
Hund û Ewrupî li ku ma
Ji Kurmanc û me kukuma
Me da serê xwe wê kuma
Xişim bi ser me de barî
Xişim hat û tev potirma
Dar û ber hişk bûn ji kurma
Hin duxun hinguv û xurma
Me çand û gand , xelkê xwarî
Xelk pir kenî bi me tama
Genim çû ewîr û ka ma
Têvedan kevirê dama
Me derda û wan vexwarî
Ku wan çi kir, ji wan ra ma
Koçk û dîwan û sera ma
Nav û nîşan û pera ma
Me jî dikir alîkarî!
Jixwe Kurmancê me şaş ma
Dûzî berda firk û kaş ma
Xelk bi pêş xist, ew li paş ma
Kesî negot tu mafdarî
Çav li çek û dabanca ma
Wî kir nekir û încama
Xwe gihandî vê encama
Ku em dibêjin: zordarî
Xelk av da û bi xwe tî ma
Nan û dan da û birçî ma
Berdîwar û hem sêwî ma
Ta ku em kirin vî arî
Agirek li ber maşa ma
Zindî ji me wek laşa ma
Jiyan tev bi Herşaşa ma
Em xopandin ji neçarî
Çare bi dest qeraşa ma
Arvanek li şûn aşa ma
Dengê doşka, reşaşa ma
Bombe û bermîl dibarî
Teqîn û top û gule ma
Ne Îzîdî ne File ma
Li şûn xênî rijale ma
Kobanê kirin diyarî
Diyarî bo Îslaman ma
Dewatek tev bêdîlan ma
Tenê ev lîsk û pîlan ma
Bi rêjîmê û vî Beşşarî
Ji rêjîma rij gemar ma
Toz û kulxan û xumar ma
Kêlpizer, dûpişk û mar ma
Bi me dada vî oldarî
Bi me bû yek Şam û Roma
Em kor dikirin bi loma
Mirov kuştin wan bi koma
Li vê gundî û vê bajarî
Gund û şarê me vala ma
Mîna şikeft û çala ma
Dîlê dost û Hevala ma
Gelparêzê tengezarî
Gelparêzekî wek min ma
Derdora xwe tev dijmin ma
Çendî zimanê min kin ma
Dîsa min bi xwe nikarî
Welato tu bi qiçka ma
Dexla te jî bi mişka ma
Tenê kevir û kuçka ma
Ne erazî ne cotarî !
Ev bûyerek çû li sêr ma
Dîrok pêr û petilpêr ma
Ji xelkê re xêr û bêr ma
Ji me re jî bes bêkarî.
